पालक पुरी

साहित्य:

• निवडलेला पालक १ जुडी
• गव्हाचे पीठ आवश्यकतेनुसार
• १ चमचा चणाडाळीचे पीठ
• २-३ हिरव्या मिरच्या व ५-६ लसुण पाकळ्या एकत्र करून पेस्ट करा.
• १ चमचा धनेपुड
• १/२ चमचा हळद
• १/२ चमचा लाल तिखट
• १ टे. स्पुन तीळ
• मीठ चवीनुसार
• तळण्याकरिता तेल

कृती:

१) सर्वप्रथम पालक धुवा व चिरा. त्यात १/२ वाटी पाणी घालुन पालक पेस्ट करून घ्या. (पालक पेस्ट करतांना पाण्याचा वापर कमी करा म्हणजे पुरीचा रंग जास्त हिरवा राहिल.)

२) पालकाच्या पेस्टमध्ये लसुण- मिरचीची पेस्ट, धनेपुड, हळद, लाल तिखट, तीळ, मीठ घाला व मिश्रण एकत्र करा.

३) तयार मिश्रणात १ चमचा चणाडाळीचे पीठ व आवश्यकतेनुसार गव्हाचे पीठ घाला. १-२ चमचे गरम तेलाचे मोहन घाला वपाणी न वापरता पालकाच्या पेस्ट मध्ये मावेल इतके गव्हाचे पीठ घालुन घट्ट कणिक भिजवुन घ्या.

४) तयार कणिकेचे छोटे गोळे करून पु-या लाटुन घ्या.

५) कढईत तेल तापवुन पु-या तळा.

चटणी किंवा साॅस बरोबर सर्व्ह करा.