भरली वांगी

प्रत्येकाला बहुतेक आवडणारा व महाराष्ट्रात सगळीकडे आवडीने खाल्ला जाणारा गावरान प्रकार भरली वांगी व भाकरी. वेगवेगळ्या पध्दतीने भरली वांगी केली जातात. भाजीत १-२ चमचे तीळकूट घातले तर चव अजून छान लागते. तसेेच यात थोडासा चिंचेचा कोळ घालून सुध्दा भाजी करतात. भाजी करतांना तिखट व मीठाचे प्रमाण आपल्या आवडीनुसार घ्या.आमच्याकडे सगळ्यांना भरली वांगी खुप आवडतात. 

साहित्य: 

• ४-५ छोटी काटेरी वांगी
• १-२ मध्यम आकाराचे बटाटे
• १ वाटी खोवलेला नारळ
• १ वाटी बारीक चिरलेला कांदा
• १/२ वाटी बारीक चिरलेली कोथिंबीर
• १ टेबलस्पून बारीक चिरलेला गूळ
• २ टेबलस्पून शेंगदाण्याचं कूट
• १ चमचा लाल तिखट
• २ चमचे गोडा/काळा मसाला
• १/४ चमचा हळद
• ५-६ लसूण पाकळ्या 
• १ छोटासा आल्याचा तुकडा 
• १ चमचा कांदा लसूण मसाला (ऐच्छिक)
• मीठ चवीनुसार

फोडणीकरिता:

• ३-४ टेबलस्पून तेल (आवडीनुसार कमी जास्त घ्या.)
• १/४ चमचा मोहरी
• १/४ चमचा हळद
• चिमुटभर हिंग

कृती:

१) काटेरी वांगी धुवून घ्यावीत. वांग्याचे वरील देठ काढून वांग्याला दोन उभ्या चिरा द्याव्यात. बटाट्याची सालं काढून मध्यम आकाराचा फोडी करून घ्या. एका भांड्यात पाणी घालून त्यात वांगी व बटाटे ठेवावेत.

२) एका थाळीत किंवा खोलगट भांड्यात खोवलेला नारळ, बारीक चिरलेला कांदा, बारीक चिरलेली कोथिंबीर, चिरलेला गूळ, शेंगदाण्याचं कूट, लाल तिखट, गोडा/काळा मसाला, हळद, कांदा लसूण मसाला (ऐच्छिक) व चवीनुसार मीठ घालून एकत्र करून घ्या.

३) एका कढईत तेल तापवून त्यात मोहरी, हिंग, हळद घालून फोडणी करून घ्या. त्यात चिरलेली वांगी व बटाटे घाला. एकत्र केलेला मसाला घालून मिश्रण कढईत घालून ३-४ मिनिटे परतून घ्या, नंतर त्यात २ वाट्या पाणी घाला व त्यात लसूण पाकळ्या व आल्याचा तुकडा खलबत्त्यात ठेचून भाजीत घाला. कढईवर एक झाकण ठेवून भाजी घट्टसर शिजवून घ्या.

४) तयार भाजी भाकरी किंवा पोळी बरोबर सर्व्ह करा.

रेसिपी आवडली तर लाईक व कमेंट नक्की करा.