रगडा पॅटीस

रगड्या करिता साहित्य:

• २५० ग्रॅम पांढरे वाटाणे
• १/४ टीस्पून खायचा सोडा
• १/२ टीस्पून हळद
• २ टीस्पून चाट मसाला
• १/२ चमचा लाल तिखट
• १ टेबलस्पून चिरलेली कोथिंबीर
• १ टेबलस्पून तेल
• मीठ चवीनुसार

पॅटीस करिता साहित्य:

• १/२ किलो उकडलेले बटाटे
• ३-४ ब्रेड स्लाईस
• १ टेबलस्पून आलं मिरची पेस्ट
• १/४ वाटी बारीक चिरलेली कोथिंबीर
• १/२ टीस्पून हळद
• मीठ चवीनुसार
• पॅटीस शॅलो फ्राय करण्यासाठी तेल

पॅटीसमध्ये भरण्यासाठी :

• १ वाटी भिजवलेली चणाडाळ
• १ टेबलस्पून चिरलेला पुदिना
• १ टेबलस्पून चिरलेली कोथिंबीर
• १-२ टीस्पून आलं-मिरची पेस्ट
• १ टीस्पून गरम मसाला
• १ टीस्पून चाट मसाला
• मीठ चवीनुसार

तिखट चटणी करिता साहित्य:

• २ वाट्या निवडलेला पुदिना
• १ वाटी निवडलेली कोथिंबीर
• १ टेबलस्पून लिंबाचा रस
• १ टेबलस्पून शेंगदाणे/ डाळं (ऐच्छिक)
• ४-५ हिरव्या मिरच्या
• १ लहान आल्याचा तुकडा
• मीठ चवीनुसार

गोड चटणी करिता साहित्य:

• १५-२० बिया काढलेला खजुर
• २ टेबलस्पून चिरलेला गूळ
• १/२ वाटी चिंचेचा कोळ
• १ टीस्पून भाजलेले जिरं
• १/२ टीस्पून लाल तिखट
• मीठ चवीनुसार

रगडा करण्याची कृती:

१) ८-१० तास पांढरे वाटाणे भिजवा.

२) वाटाण्यात १/४ चमचा हळद, १/४ चमचा खायचा सोडा व बेताचे पाणी घालून कुकरमध्ये वाटाणे शिजवून घ्या.

३) एका कढईत तेल तापवून त्यात १/४ चमचा हळद , लाल तिखट व शिजवलेले वाटाणे घाला. चाट मसाला व चवीनुसार मीठ घालून मिश्रण एकत्र करून घ्या. उकळी आली की गॅस बंद करा. एका भांड्यात काढून त्यात बारीक चिरलेली कोथिंबीर घाला.

पॅटीसमधील सारणाची कृती:

१) एका भांड्यात भिजवलेली चणाडाळ शिजवून घ्या.
शिजवलेली चणाडाळ चाळणीत उपसून ठेवा.

२) एका कढईत १/२ टेबलस्पून तेल तापवून त्यात
शिजवलेली चणाडाळ घालून १-२ मिनिटे परता. त्यात चिरलेला पुदिना, चिरलेली कोथिंबीर, आलं-मिरची पेस्ट ,गरम मसाला ,चाट मसाला व चवीनुसार मीठ घालून मिश्रण एकत्र करून घ्या.

पॅटीस करण्याची कृती:

१) मिक्सरमध्ये ब्रेड स्लाईसचा चुरा करा. एका भांड्यात उकडलेले बटाटे सोलून मॅश करून घ्या. त्यात ब्रेडचा चुरा, आलं मिरची पेस्ट, बारीक चिरलेली कोथिंबीर, हळद व चवीनुसार मीठ घालून मिश्रण एकत्र करून घ्या.

२) बटाट्याचा लिंबाएवढा गोळा घेऊन त्याची खोलगट वाटी करून त्यात १ चमचा चणाडाळीचे तयार सारण भरून वाटी बंद करून त्याला चपटा आकार द्यावा. तयार पॅटीस तव्यावर तेल सोडून शॅलो फ्राय करा.

तिखट चटणीची कृती:

१) पुदिना व कोथिंबीर धुवून घ्या.

२) मिक्सरच्या भांड्यात पुदिना, कोथिंबीर, लिंबाचा रस, शेंगदाणे/ डाळं (ऐच्छिक), हिरव्या मिरच्या, आल्याचा तुकडा व मीठ चवीनुसार घालून बारीक वाटून घ्या.

३) तयार चटणी एका भांड्यात काढून घ्या.

गोड चटणीची कृती:

१) बिया काढलेला खजूर २ तास पाण्यात भिजवून घ्या किंवा कुकरमध्ये शिजवून घ्या.

२) मिक्सरच्या भांड्यात भिजवलेला/ शिजवलेला खजुर, चिरलेला गूळ , चिंचेचा कोळ, भाजलेले जिरं , लाल तिखट व चवीनुसार मीठ व आवश्यकतेनुसार पाणी घालून बारीक चटणी वाटून घ्या. तयार चटणी गाळण्याने गाळून घ्या ( ऐच्छिक)

रगडा पॅटीस सर्व्ह करतांना:

एका खोलगट बाऊलमध्ये २ पॅटीस त्यावर आवडीनुसार तिखट चटणी, गोड चटणी व गरमागरम रगडा घालावा. बारीक चिरलेला कांदा व चिरलेली कोथिंबीर घालून सर्व्ह करा.