व्हेज. शेझवान फ्राईड राईस

व्हेज. शेझवान फ्राईड राईस करतांना जे घरात सहज उपलब्ध असेल ते पदार्थ वापरून मी फ्राईड राईस करते. मक्याचे दाणे, कांदा पात असेल तर वापरते. पटकन तयार होणारी व घरात सगळ्यांच्या आवडीची रेसिपी. 

साहित्य:

• १ वाटी बासमती तांदूळ 
• २-३ लसुण पाकळ्या व थोडेसे आलं (ऐच्छिक )
• १/४ वाटी उभी चिरलेली सिमला मिरची 
• १/४ वाटी उभी चिरलेले गाजर 
• १/४ वाटी उभी चिरलेला कोबी 
• १/४ वाटी बारीक चिरलेला कांदा 
• १/४ वाटी बारीक चिरलेली कांदा पात ( ऐच्छिक)
• २ टेबलस्पून तेल 
• १ टेबलस्पून शेझवान साॅस 
• १ टीस्पून सोया साॅस 
• १/२ टीस्पून लाल तिखट 
• १ टेबलस्पून तयार शेझवान फ्राईड राईस मसाला 
• चवीनुसार मीठ 

कृती :

१) प्रथम एका भांड्यात मोकळा भात शिजवून घ्या.

२) एका नाॅन-स्टीक पॅन मध्ये तेल तापवून त्यात चिरलेला लसूण व आलं (ऐच्छिक),चिरलेला कांदा , सिमला मिरची, गाजर घालून २‌-३ मिनिटे परतून घ्या. त्यात सोया साॅस, शेझवान साॅस, लाल तिखट, तयार शेझवान फ्राईड राईस मसाला घालून परता. तयार भात, चिरलेला कोबी व चवीनुसार मीठ घालून भात एकत्र करून २-३ मिनिटे परतून घ्या. आवडीनुसार चिरलेली कांदा पात बारीक चिरून घाला.